மெர்க்குரி – விமர்சனம் மினி விமர்சனம்

கரு : பார்வையற்ற ஒருத்தர்., 5 வாய்பேச இயலாத , செவித்திறன் குறைபாடுடைய மாற்று திறனாளிகளின் அஜாக்கிரதையால் அகால மரணமடைகிறார்.
அந்த பார்வையற்றவரின் ஆன்மா அந்த 5 பேரையும் எப்படி பழி வாங்குகிறது? என்பதும் ., இவர்களில் பார்வையற்றவர் அப்பகுதியில் இயங்கி வந்த மெர்குரி (பாதரசம்) ஆலை கழிவினால் பாதிக்கப்பட்டு மாற்று திறனாளி... ஆனவர் என்பதும்தான் " மெர்குரி " படத்தின் கருவாகும். 

கதை : கதைப்படி .,மெர்குரி எனும் பாதரச ஆலை கழிவினால் கருவிலேயேபாதிக்கப்பட்டு மாற்று திறானிகளான இந்துஜா, சனந்த் ரெட்டி ,அனிஷ் பத்மநாபன், தீபக் பரமேஷ், ஷஷாங்க் .... உள்ளிட்ட 5 பேருக்கும் காதும் கேட்காது. வாய் பேசவும் முடியாது. இவர்கள் 5 பேரும் மலைப்பிரதேசம் ஒன்றிற்கு கொண்டாட்டத்திற்காக வருகின்றனர். இதில் சனந்த், இந்துஜாவை காதலித்து வருகிறார். ஆனால் தனது காதலை நாயகியிடம் கூறவில்லை. 

இந்நிலையில், இந்துஜாவிடம் தனது காதலை சொல்ல எண்ணி, சனந்த் அவரை இரவில் காரில் வெளியில் கூட்டிச் செல்கிறார். அப்போது அவர்களது நண்பர்களும் உடன் செல்கின்றனர். இருப்பினும் ஒரு தனிமையான இடத்தில் வைத்து சனந்த் தனது காதலை சொல்ல, இந்துஜாவும் காதலை ஏற்றுக் கொள்கிறார். 



இதையடுத்து மீண்டும் வீட்டிற்கு திரும்பும் வேளையில், அவர்களது காரில் ஏதோ மாட்டிக் கொண்டிருப்பது போல அவர்களுக்கு தோன்ற, காரை நிறுத்தி பார்க்கும் போது, பிரபுதேவா உடம்பில் ஒரு சங்கிலி கட்டப்பட்டு, அதன் மறுமுனை காரில் மாட்டி, அவர் இழுத்து வரப்பட்டுள்ளார் என்பது தெரிய வருகிறது. அவரது உடலில் உயிர் இல்லாததால், அதிர்ச்சியடையும் நண்பர்கள், பிரச்சனையில் சிக்கிவிடக் கூடாது என்பதற்காக அவரது உடலை தாங்கள் வந்த காரிலேயே எடுத்துச் செல்கின்றனர். 

பின்னர் அங்குள்ள மூடப்பட்ட பாதரச தொழிற்சாலையின் ஒதுக்குப் புற பகுதியில் பிரபுதேவாவின் உடலை போட்டுவிட்டு திரும்புகிறார்கள். இந்நிலையில், அவர்களில் ஒருவரது ஐபாட் அந்த தொழிற்சாலை பகுதியில் சிக்கிக் கொள்ள, அதை எடுக்க மீண்டும் அந்த தொழிற்சாலைக்கு போகும் போது, பிரபுதேவா உயிரோடு நிற்கிறார். அவரை பார்த்து நண்பர்கள் அனைவரும் மிரண்டு போகிறார்கள். பிரபுதேவா அவர்களை கொல்ல முயற்சி செய்கிறார். 

கடைசியில் கண் தெரியாத பிரபுதேவா அவர்களை கொன்றாரா? வாய் பேசமுடியாத, காது கேட்காத தோழர்கள் 5 பேரும் பிரபுதேவாவிடம் இருந்து தப்பித்தார்களா? பிரபுதேவா எப்படி உயிரிழந்தார்? எப்படி உயிரோடு வந்தார்? அவரது வாழ்க்கையில் என்னவெல்லாம் நடந்து பார்வை பறிபோனது? என்பதும் தான் " மெர்குரி " படத்தின் கதையும் , களமும். 

காட்சிப்படுத்தல் : ஸ்டோன் பென்ச் பட நிறுவனம் தயாரிப்பில் ., கார்த்திக் சுப்புராஜின் இயக்கத்தில் , பீட்ஸா , ஜிகர்தண்டா போன்றவற்றை எதிர்பார்த்து போகும் ரசிகனுக்கு இப்படம் காட்சிப்படுத்தப்பட்டிருக்கும் விதம் சாதா கல் தோசையாகவும், நீர்மோராகவும் கூட தாகம் தணிக்காதது வருத்தம். அதற்குக் காரணம் இப்படம் பேசாத படம் என்பது அல்ல ... ஒருவகையில் பேசவைக்கும் படமாக காட்சிப்படுத்தப்படாததே காரணம் எனலாம்., 

கதாநாயகர் :கண்ணால் பார்க்க முடியாது என்றாலும், ஓசையினாலேயே அதிர வைத்திருக்கிறார் பிரபுதேவா. கண் தெரியவில்லை என்றாலும், சாம்பல் நிற விழிகளோடு அவர் பார்க்கும் அந்த பார்வையாலும், செவியால் உணர்ந்து பிரதிபலிக்கும் கதாபாத்திரத்திலும் பிரபுதேவா மிரட்டியிருக்கிறார்...மிரட்டி. 
அவரது நடிப்பு படத்திற்கு கூடுதல் வலு சேர்த்திருக்கிறது. 

பிற நட்சத்திரங்கள் : பிரபுதேவாவின் ஜோடியாக ரம்யா நம்பீசன் வரும் காட்சிகள் ரம்மியமாக இருக்கிறது. 

அதேபோல் கிட்டத்தட்ட 
இப்பட நாயகி எனும் அளவிற்கு வரும் இந்துஜா, காது கேட்காத, வாய் பேச முடியாத கதாபாத்திரத்தில் வாழ்ந்திருக்கிறார் என்று தான் சொல்ல வேண்டும். , தான் சொல்ல நினைப்பதை செய்கையால் சொல்லி புரிய வைப்பதில் ரசிக்க வைத்திருக்கிறார். அதேபோல் சனந்த், அனிஷ், தீபக், சஷாங்க் உள்ளிட்ட அனைவருமே அவர்களது கதபாத்திரத்திற்கு பலம் சேர்த்திருக்கின்றனர். 

தொழில்நுட்பகலைஞர்கள் : திருவின் ஒளிப்பதிவில் பெரும்பாலும் இரவு நேர காட்சிகள் என்றாலும் , சிறப்பாக வந்துள்ளன. , பனி அடந்த மலைப்பகுதி, மூடப்பட்ட திகில் தொழிற்சாலை ...என பல இடங்களில் பல பரிணாமங்கள் மூலம் ஒவ்வொரு சீனையும் உயர்த்தி பிடித்திருக்கிறார். 

பாஷையே இல்லாத பேசாத படம் என்பதால் இசையமைப்பாளர் சந்தோஷ் நாராயணன். பின்னணி இசையில் மிரட்டியிருக்கிறார் என்று கூறினால் அது மிகையாகாது. அந்த அளவுக்கு இசையாலேயே பேசியிருக்கிறார். திகிலூட்டியிருக்கிறார். வாவ்! 

பலம் : மொத்தப் படமும் பேசாத படம் என்பது... 

பலவீனம் : பலவீனமும் பேசாத படம் என்பதும் , "ஹைரேன்ஜ் " எனும் மலையாளப் படக் கதையை மெளனமாக சுட்டிருப்பதும் பலவீனம். 

இயக்கம் : காது கேட்காத, வாய் பேச முடியாத 5 பேருக்கும், கண் தெரியாத ஒருவரின் ஆன்மாவுக்கும் இடையே நடக்கும் மௌனப் போராட்டமாக இந்த படத்தை உருவாக்கி இருக்கிறார் கார்த்திக் சுப்புராஜ். 

பாஷை எதுவும் இல்லாமல் வெறும் பின்னணி இசையோடு துவங்கும் 5 பேரின் பயணம், அவர்களது அஜாக்கிரதையால் எதிர்பாராமல் நடக்கும் விபத்தால் திசைமாறி, திகில் திருப்பங்களுடன் மொத்த படத்திலும் பேசாமல் பேசி ., கடைசியில் மௌனமே வலிமையான அலறல்... என்பதை கார்த்திக் சுப்புராஜ் தனது பாணியில் சொல்லி ஜெயிக்க முயற்சித்திருக்கிறார். 



மெர்குரி தொழிற்சாலையால் மக்களுக்கு ஏற்பட்ட பாதிப்பு, இதேபோல் , இன்றைய காலகட்டத்தில் மற்ற தொழிற்சாலைகளாலும் மக்களுக்கு பாதிப்பு ஏற்பட வாய்ப்பு இருக்கிறது என்பதை கருத்துடன் சொல்லியிருக்கிறார். கார்ப்பரேட் நிறுவங்களால் மக்களுக்கும், சுற்றுச்சூழலுக்கும் ஏற்படும் பாதிப்புகளையும் இயக்குனர் மறைமுகமாக சாடியிருக்கிறார் என்று தான் கூற வேண்டும். அதற்காக அவரை பாராட்டலாம். ஆனால் , அதே நேரம் மொத்தப் படமும் கார்த்திக் சுப்புராஜிடம் ரசிகர்கள் எதிர்பார்த்த அளவிற்கு இல்லாதது வருத்தம். 

ஆகமொத்தத்தில் ., `'மெர்குரி' - 'பரிகாசிக்கும்படியும் இல்லை.... பிரகாசமாகவும் இல்லை! "#tamilmoviereview

0 comments:

Post a Comment